2009

2010

2008

12.12 / 10.01.10     ZOMBÍ

                                FLORENCE LUCAS - GÚSTAV GEIR BOLLASON - ROLAND MOREAU -  VINCENT CHHIM - ÞÓRARINN BLÖNDAL

 

 

 

 

 

Í skammdeginu opnuðust flóðgáttir ímyndunarinnar  og henni voru allir vegir færir, því hér var nánar tiltekið um að ræða sýningu á og  í myrkri, þar sem tekist var á við myrkrið og ógnir þess sem upplifun, ekki í neinum skilgreindum listrænum tilgangi heldur mun frekar sem hríslandi skemmtun fyrir fólk á öllum aldri.

Í tímans rás hefur goðsögnin um Zombí tekið á sig nokkrar mismunandi myndir og merkingar. Við þekkjum öll uppvakninging, hinn  íslenska  Þorgeirsbola sem og aðrar skuggaverur, miður viðkunnanlega náunga sem hér voru sendir af kunnáttumönnum á milli landsfjórðunga. Spurst hefur til hans víða um heiminn  og ef ekki dauðum og upprisnum, þegjandalegum, ráfandi um ankanalegur í göngulagi í erindum eiganda síns,  þá alla vegana sem hugsana og viljalausu verkfæri í hans höndum. Á seinni tímum hefur mest borið á honum í teiknisögum og kvikmyndum. Þar fer hann gjarnan um stjórnlaus, í sístækkandi hópum sísvangra og fáránlegra mannskrímsla sem hungrar helst í kjötið af samborgurum sínum og stefnir örvita að endalokum siðmenningar og heimsendi.

En það er  ekki síst hinn „heimspekilegi“ Zombí sem hér ræður titli, hann mun vera lítt meðvitaður og hugsanalaus sem þó kann að haga sér og lítur  út fyrir að vera venjuleg manneskja.

Verkin á sýningunni samanstóðu  af hljóðverki, innsetningum og teikningum.

01.08 / 22.08  KVÖRN

                           Á sýningunni voru verk eftir stofnendur Verksmiðjunnar og einn gest.

                             AÐALHEIÐUR S. EYSTEINSDÓTTIR, ARNAR ÓMARSSON, ARNA VALSDÓTTIR, A.P.E. , CLÉMENTINE ROY,

                             GÚSTAV GEIR BOLLASON, HLYNUR HALLSSON, JÓN LAXDAL, JÓNA HLÍF HALLDÓRSDÓTTIR, KNUT ECKSTEIN,

                             LENE ZACHARIASSEN, VÉRONIQUE LEGROS, ÞÓRARINN BLÖNDAL.

 

 

 

 

 

 

Tvö ár voru þá liðin síðan hópurinn lagði af stað með fyrirætlanir um blómlegt menningarlíf í gömlu Verksmiðjunni á Hjalteyri.

Ekki verður annað sagt en vel hafi tekist til og listáhugafólk verið duglegt að leggja leið sína á fjölbreytilega viðburði og sýningar. Verksmiðjan hefur öðlast nýtt líf í hugum fólks og möguleikarnir óendanlegir.

 

27.06 / 19.07  KORSÖNGUR VÉLANNA, HÚSAMEISTARI KÖNGULÓ

                           PÉTUR ÖRN FRIÐRIKSSON  /  ILMUR MARÍA STEFÁNSDÓTTIR

 

 

 

 

Árvökulir vegfarendur á Hjalteyri gátu að nýju heyrt glaðlegan vélargný úr Verksmiðjunni. Hann stafaði frá heimilistækjum, steypuhrærivél og óvenjulegum rennibekk. Þau höfðu þar afsannað einhliða notagildi sitt og í fagurfræðilegum tilgangi, raskað og sett sig úr samhengi hlutanna með nýjum og óvæntum verkefnum.

 

Hljóðlátari var köngulóin sem að með aðstoð trésmiðs  spann sér íverustaði út um allt og inn í skúmaskotin.

 

Listamennirnir Pétur Örn Friðriksson og Ilmur María Stefánsdóttir eiga það helst sammerkt að fást við gagnslausar tilraunir á mörkum þess nytsamlega og tæknilega. Niðurstaðan  birtist oftar en ekki í mjög fullkomnum hlutum.

 

30.05 / 21.06  HERTAR SULTARÓLAR

                           PÉTUR KRISTJÁNSSON, HELGI ÞÓRSSON, GEORGE HOLLANDERS, HENRIETTE VAN EGTEN, ANNA RICHARDS,

                           JÓNBORG SIGURÐARDÓTTIR, HARALDUR INGI HARALDSSON, SAFN HAFDÍSAR ÓLAFSSON,

                           KRISTINN RÚNAR GUNNARSSON, ERIKA LIND, ÍRIS ÓLÖF SIGURJÓNSDÓTTIR, LAUFEY PÁLSDÓTTIR,

                           ARNFINNA BJÖRNSDÓTTIR, HANS KRISTJÁN

                           7. OG 8. BEKKUR ÞELAMERKURSKÓLA UNDIR HANDLEIÐSLU AÐALHEIÐAR S. EYSTEINSDÓTTUR

 

                           sýningarstjóri : Aðalheiður Eysteinsdóttir

 

 

Verksmiðjan loftaði út eftir kaldan en viðburðaríkan vetur með sýningunni “Hertar sultarólar” og vildi  með henni vekja athygli á að eftirtalin kynnu að hafa öðlast nýtt líf, stökkbreytt og endurhönnuð til framtíðar:

 

gálgi - ónýt heimilistæki – listamaður – sígarettur – kjóll – straujárn - ferskur fiskur – frístundafólk – markaður – blússa - fjársjóður - úrelt dagatöl – langanir - klippimyndir – safnarar – matarumbúðir – dagblöð – pils – hönnuður – myndverk – vél - ruslakista - hráefni og hugmyndir.